Musica e Canti Popolari Italiani

Li furisteri ca 'n Sicilia sunnu
la guardanu cu granni meravigghia
dicinu ca nun c'è 'nta tuttu u munnu
'n'isula ca la nostra rassumigghia.

La conca d'oru è chidda ca straluci
supra la nivi muncibeddu riri
spanni lu faru la so bianca luci
l'anapu scurri in mezzu a li papiri.
Sicilia Sicilia canta la pasturedda
Sicilia Sicilia joca la funtanedda
l'aria e lu suli inchinu l'arma di puisia
Sicilia Sicilia tu si la terra mia.

L'aceddi pipitianu a matinata
la zagara d'aranci e minnuliddi
cu la vuccuzza duci e n'zuccarata
cantanu comu cantanu li stiddi.

Lu suli spunta supra la muntagna
d'oru e zicchinu parri raccamata
li picuricchi mezzu la campagna
si mancianu l'ervuzza abbarsamata.
Sicilia Sicilia canta la pasturedda
Sicilia Sicilia joca la funtanedda
l'aria e lu suli inchinu l'arma di puisia
Sicilia Sicilia tu si la terra mia.

L'amuri è un focu ca nun fa faiddi
picchì 'nta l'arma cuva e nun si viri
cchiù capricciusa di li picciriddi
ti fa ghittari lacrimi e suspiri.

'Nna picciuttedda ca ti voli beni
sulu 'n sicilia tu la poi truvari
lu cori d'amurusi peni
idda sultantu sapi cunsulari.
Sicilia Sicilia canta la pasturedda
Sicilia Sicilia joca la funtanedda
l'aria e lu suli inchinu l'arma di puisia
Sicilia Sicilia tu si la terra mia.

L'aria e lu suli inchinu l'arma di puisia
sicilia sicilia tu si la terra mia.