Musica e Canti Popolari Italiani - A Diosa (Non Poto Reposare)

Non potho reposare amore, coro,
pessende a tie so donzi momentu;
no istes in tristura, prenda 'e oro,
ne in dispiaghere o pessamentu.
T'assiguro ch'a tie solu bramo,
ca t'amo forte, t'amo, t'amo, t'amo.

Amore meu prenda 'e istimare,
s'affettu meu a tie solu est dau.
S'aere giuttu sas alas a bolare
milli vortas a s'ora ippo volau,
pro vennere nessi pro ti saludare,
s'attera cosa nono a t'abbisare.

Si m'esseret possibile d'anghelu,
d'ispiritu invisibile piccavo
sas formas e furavo dae chelu
su sole, sos isteddos e formavo
unu mundu bellissimu pro tene
pro poder dispensare cada bene.

Amore meu, rosa profumada,
amore meu, gravellu olezzante,
amore, coro, immagine adorada,
amore, coro, so ispasimante,
amore, ses su sole relughente,
ch'ispuntat su manzanu in oriente.

Ses su sole ch'illuminat a mie,
chi m'esaltat su coro e-i sa mente;
lizu vroridu, candidu che nie,
semper in coro meu ses presente.
Amore meu, amore meu, amore,
vive sentz'amargura, nen dolore.

Si sa lughe d'isteddos e de sole,
si su bene chi v'est in s'universu
aere pothiu piccare in-d-una mole,
comente palumbaru m'ippo immersu
in fundu de su mare a regalare
A tie vida, sole, terra e mare.

Unu ritrattu s'essere pintore,
un'istatua 'e marmu ti vachia
s'essere istadu eccellente iscultore,
ma cun dolore naro: "Non nd'ischia".
Ma non balene a nudda marmu e tela
in cunfrontu 'e s'amore d'oro vela.

Ti cherio abbratzare egh'e basare
pro ti versare s'anima in su coro:
ma dae lontanu ti deppo adorare.
Pessende chi m'istimas mi ristoro,
chi de sa vida nostra tela e tramas
an sa matessi sorte prite m'amas.

Sa bellesa 'e tramontos, de manzanu
s'alba, s'aurora, su sole lughente,
sos profumos, sos cantos de veranu,
sos zeffiros sa bretza relughente
de su mare, s'azurru de su chelu
sas menzus cosas dò a tie, anghelu.