Ah! che bell'aria fresca,
ch'addore 'e malvarosa,
e tu durmenno staje!
ncopp'a sti ffronne 'e rosa.
 
'O sole a poco a poco
pe stu ciardino sponte;
'O viente passa e vasa
stu ricciulillo nfronte.
 
I' te vurria vasà...
ma 'o core nun m' 'o ddice 'e te scetà
I' me vurria addurmì
vicino 'o sciato tujo
n'ora pur' i'.
 
Tu duorme oj Rosa mia?
E duorme a suonno chino;
mentr'io guardo ncantato
stu musso curallino
 
E chesti carne fresche,
e chesti trezze nere,
me mettono int' 'o core
mille male penziere.
 
I' te vurria vasà...
 
Sento stu core tujo
che sbatte comm' 'a ll'onne
durmenno, angelo mio,
chi sa tu a chi te suonne!
 
'A gelusia turmenta
stu core mio malato;
te suonne a me? Dimmello...
o pure suonne a n'ato?
 
I' te vurria vasà...