La prima mugghjeri ch'avìa
era 'nu pezzu di fimmanà:
èramu sempri in allegria
e cu' tanta felicità!
Vinni la morti e si la levàu,
cu' tanti peni mi dassàu.

La secunda chi m'haju pigghiatu
è 'nu diavulu scatinatu
e cu' tutti si sciarrìa
dalla sira a la matina.
Maramìa, paci e beni,
ch'è diavula 'sta mugghjeri!

Ahi, ahi, ahi! Chi mugghjeri chi capitai!
La mandai a lu mulinu,
lu saccu vacanti lu portau chinu.
Quali fu lu focu amaru:
si sciarriàu cu' mulinaru.
Maramia, paci e beni,
ch'è diavula 'sta mugghjeri!

Ahi, ahi, ahi! Chi mugghjeri chi capitai!
'Nci accattai la gùgghia e lu filu,
no' la vitti cusiri mai.
Tempu tri anni, tri jorna e tri misi
mi cusìu tri cammisi.
Maramia, paci e beni,
ch'è diavula 'sta mugghjeri!

Ahi, ahi, ahi! Chi mugghjeri chi capitai!
'Nci accattai lu fusu e la stuppa:
no' la vitti filari mai.
'Menzu tri anni, tri jorna e tri misi
mi filau sulu du' pisi.
Maramia, paci e beni,
ch'è diavula 'sta mugghjeri!

Ahi, ahi, ahi! Chi mugghjeri chi capitai!
'Nci accattai lu tilaredu:
no' la vitti tessìri mai.
Tempu tri jorna, tri misi e tri anni
mi tessìu sulu du' canni.
Maramia, paci e beni,
ch'è diavula 'sta mugghjeri!